你的報名時間尚餘:

病毒的結構

 

病毒嘅結構非常簡單,病毒基本結構只有中心核酸及蛋白質外殼兩部份。中心核酸即係病毒嘅遺傳物質,可以由DNA或RNA組成。而包圍核酸嘅一層蛋白質就稱為衣殼(capsid),用嚟保護病毒基因。

 

唔同種類嘅病毒外型都可以好唔同,部分攻擊動物細胞嘅病毒喺最外層仲有一層包膜(envelope),而唔同病毒嘅包膜表面有唔同嘅蛋白質,用作分辨同埋進入宿主細胞!新型冠狀病毒就係因為包膜上面嘅蛋白質好似皇冠咁樣所以就有呢個名啦!

 

另一種外型特別嘅病毒叫噬菌體(bacteriophage),呢種病毒專門攻擊細菌,佢嘅外型好似一支針筒咁,除左裝住遺傳物質嘅「頭部」之外,仲有一條「尾巴」,尾巴底部再有幾隻「腳」。噬菌體嘅「腳」係用嚟分辨適合嘅宿主,搵啱之後,遺傳物質就會從「頭部」通過「尾巴」進入受感染嘅細菌啦!